Բարի Գալուստ

Ոսկեթևիկ իմ արտուտիկ,
Թռիր դեպի կապույտ երկինք,
Թևերդ բաց վստահ ու քաջ
Թռիր վերև ու միշտ առաջ։

Պատմություն

Երևանի Վալդորֆյան մանկապարտեզը հիմնադրվել է 1991 թվականին մի խումբ ծնողների և նախաձեռնող ընկերների օգնությամբ, անկախացած երկրի ճգնաժամային տարիներին։ Այն գործել է սկզբում պետական մանկապարտեզում, որպես այլընտրանքային խումբ, հետագայում կայացել որպես ինքնուրույն կառույց։

«Դեղին արտույտը» մշտապես պահպանել է Վալդորֆյան մանկավարժության սկզբունքները։ Մանկապարտեզը 2011 թ. անդամակցում է «Վալդորֆյան մանկապարտեզների միջազգային ընկերությանը» (IASWECE)։

Այսօր մանկապարտեզում գործում է երկու խումբ.

  • «Ցողեր»՝ վարող դաստիարակ Օլգա Սարոյան, դաստիարակների թեկնածուներ Հռիփսիմե Հովհաննիսյան, Հասմիկ Դանիելյան։
  • Եվ «Շողեր»՝ վարող դաստիարակ Անի Բարսեղյան, դաստիարակի թեկնածուներ՝Զարուհի Մատինյան, Նելլի Աղաբեկյան։

Մեր սկզբունքն է «Պահպանել մանկությունը, խթանել երեխայի ներդաշնակ զարգացմանը, նպաստել երեխայի սոցիալականացմանը», ինչն այնքան կարևոր է հետագա կյանքում։ Ծնողների հետ միասին կառուցել առողջ միջավայր երեխաների համար։

Մանկապարտեզի առօրյան

Մանկապարտեզն աշխատում է 08։30-18։00։

Օրվա ռեժիմը կառուցում է որոշակի ռիթմով։

Օրը սկսվում է արտուտիկի թռիչքով։ Ամեն ոք իր գործն ունի, ամեն անկյուն՝ իր բնակչին է սպասում։ Շաբաթը հագեցած է զբոսանքով, ազատ խաղով, ջրաներկով, ծեփում, երաժշտական շրջանով, ձեռքի աշխատանքով (ասեղնագործություն, փայտամշակում, հողագործություն և այլն), թատրոնով ու հեքիաթով։

Ահա և շաբաթը մոտեցավ ավարտին, փոքրիկ թզուկները գործի են անցնում, սենյակը մաքրում, անհամբեր սպասում նոր շաբաթին։ Ամեն շաբաթ իր տրամադրությունն ունի, տարին՝ իր ընթացքը, հիմք ընդունելով դա, ամեն շրջանին նվիրվում է մի տոն։

Ծնող և մանկապարտեզ

Մանկապարտեզի կառավարման գործում անմիջական մասնակցություն ունեն ծնողները։ Նրանց հետ մեկտեղ անցկացվում են սեմինարներ, զրույցներ, ձեռքի աշխատանք, ներկայացումներ են բեմադրվում այդ հիմքն ավելի ամուր դնելու ուղղությամբ։

Հեռանկարում

Մեզ դիմող երեխաների ցանկը շարունակաբար աճում է։ Ուստի խնդիր է դրվում ընդլայնել տարածքը և բարելավել պայմանները։

Վերջաբան

Ընդունիր երեխային ակնածանքով,
Սիրով դաստիարակիր և ճանապարհիր ազատ։
Ռ. Շտայներ